ஆன்மாவை மறைக்கும் ஏழு திரைகள்

 

சுத்த வேதாந்தத் துரியமேல் வெளியெனும்

அத்தகு சிற்சபை அருட்பெருஞ்ஜோதி!      

-  அருட்பெருஞ்சோதி அகவல் 42

 

இந்து சமயத்தில் கூறுகின்ற போதாந்தம், யோகாந்தம் மற்றும் வேதாந்தம் இவைகளின் மொத்த அனுபவமே ‘சுத்த வேதாந்தம்’ என்கின்றார் வள்ளற்பெருமான்.

 “வேதாந்தத்தில் போதாந்த, யோகாந்தமும், சித்தாந்தத்தில் நாதாந்த, கலாந்தமும் அடங்கியிருக்கின்றன. இந்த ஐக்கியம் பற்றி வேதாந்த, சித்தாந்தமே இப்போது அனுபவத்தில் சுத்த வேதாந்த, சுத்த சித்தாந்தமாய் வழங்குகின்றன.” 

(திருவருட்பா - உரைநடை நூல் > பக்கம்-401).

 

          போதாந்தம் - அறிவின் முதிர்ச்சி

          யோகாந்தம் - யோகத்தின் முதிர்ச்சி

          வேதாந்தம் - வேதத்தின் முதிர்ச்சி

 

இந்த மூன்று முதிர்ச்சியின் முதிர்ச்சி எதுவோ? அதுவே “சுத்த வேதாந்தம்” ஆகும்.

 அது எது என்றால்? 

துரிய மேல் வெளியே சுத்த வேதாந்த அனுபவமாக உள்ளது. 

துரிய நிலை அனுபவமானது ஆன்ம ஆனந்தத்தை கொடுக்கும். 

யோகத்தின் வழி இவ்வனுபங்களை பெறாமல், அதற்கும் மேற்பட்ட அனுபவங்களை ஆன்ம தயவினால் பெறலாம் என்கிற கருத்தினை இங்கு வள்ளலாரும் வலியுறுத்துகிறார். 

அதாவது, நமது ஆன்மாவினை அஞ்ஞானம் என்ற ஏழு திரைகள் மறைத்துக் கொண்டுள்ளன. நம்முடைய உண்மையான சொரூபமான ஆன்மாவை மறைக்கின்ற இத்திரைகளை நாம் ஒவ்வொன்றாக விலக்கிக் கொள்ளும்போது மட்டுமே, நமக்கு ஏற்படும் அனுபவம் ஆன்ம அனுபவம் என்கிறார் வள்ளல் பெருமான். 

இவ்வாறு, இந்த ஆன்மவை தரிசிக்காமல், வெறும் சடங்காக மூடப்பட்ட ஏழு துணித்திரைகளை விலக்கி, ஆன்ம ஜோதி தரிசனம் என்ற பெயரில் தீப ஒளியை தரிசிப்பது துரிய நிலை ஆகாது.

ஓம் தத் ஸத்!